Мұнай компаниясының басшылары миллиард теңгенің ұрлығы бойынша ұсталды
Сурет: Zakon.kz
"ОйлТранспортКорпорейшн" ЖШС-нің ("ҚазМұнайГаз" ҰК АҚ еншілес кәсіпорны) лауазымды тұлғалары тауар жеткізушіден 1,5 млрд теңгеден астам сомаға техникалық ерекшелікке сәйкес келмейтін автобустарды қабылдағаны анықталды. Бұл ретте олардың құны 400 млн теңгеге жоғарылатылған.
Жұмыс істелмеген арнайы техника қызметтері үшін 110 млн теңге мөлшерінде ақша қаражатын аудару фактілері белгілі болды.
"Ал, "West Oil Software" ЖШС-де ("ОйлТранспортКорпорейшн" ЖШС мердігерлік ұйымы) жұмыс істемеген адамдарға 400 млн теңгеден астам жалақы төлеу, компания басшылығының жақын туыстарын қоса алғанда негізсіз жалақы есептеу деректері орын алған." Маңғыстау облысының прокуратурасы
Аталған бұзушылықтар бойынша Қылмыстық кодекстің 189-бабының 4-бөлігі (сеніп тапсырылған бөтен мүлікті ірі мөлшерде беру немесе жымқыру) бойынша 5 сотқа дейінгі тергеп-тексеру басталды. Процестік прокурорлар тағайындалды.
Сотқа дейінгі тергеп-тексеру шеңберінде аталған ұйымдардың 4 басшы лауазымды тұлғалары ұсталды.
Қылмыстық істер облыстық экономикалық тергеу департаментінің өндірісінде.
Басқа мәліметтер тергеу мүддесі үшін жария етілмейді.
2023 жылдың соңында "West Oil Software" ЖШС қызметкерлері бірнеше айға созылған ереуілге шықты. Олар "ҚазМұнайГаз" Ұлттық компаниясы" АҚ-ға қосылуды, оларға бірыңғай еңбекақы төлеу жүйесін таратуды, материалдық-техникалық базасын жаңартуды талап етті.
Келіссөздер нәтижесінде кейбір ереуілшілер өз орындарына оралды.
