"Хуторский" ҰҚТ жетекшісі деп аталған Хасан Қасымбаевтың ұсталуына қатысты жаңа мәліметтер белгілі болды
Сурет: Хасан Қасымбаевтың инстаграм парақшасынан алынды
2024 жылдың 4 қарашасында Хасан Қасымбаевтың қамауға алынғаны туралы ақпарат әлеуметтік желілерде пайда болды. Оны кейін облыстық полиция департаменті де растады.
"2021 жылдың маусым айында азамат А.-ның денсаулығына қасақана ауыр зиян келтірді және ұрлады деген күдікпен Алматы облысының қылмыстық істер жөніндегі мамандандырылған ауданаралық сотының үкімімен сотталған бес күдікті ұсталды, олар қазіргі уақытта бас бостандығынан айыру орындарында жазасын өтеп жатыр. Жүргізілген жедел-іздестіру іс-шараларының қорытындысымен жоғарыда аталған қылмыстық әрекеттерге қатысы бар деген күдікпен 2024 жылғы 2 қарашада азамат К. ұсталып, уақытша ұстау изоляторына қамалды. Қылмыстың барлық мән-жайларын жан-жақты, толық және объективті тергеп-тексеруді қамтамасыз ету мақсатында жедел-іздестіру шаралары кешені жүргізілуде", — деп хабарлады Алматы облыстық полиция департаментінің баспасөз қызметі.
Сондай-ақ департамент бұлтартпау шарасын қолдану үшін іс материалдары сотқа жіберілгенін тағы да айтты.
"Тергеу барысы облыстық ішкі істер департаменті басшылығының бақылауында, тергеу мүддесі үшін басқа мәліметтер жария етілмейді". Алматы облысы ПД баспасөз қызметі
Интернетте 2024 жылдың 4 қазанына қараған түні Талғарда болған 16 жастағы Шерзат Полаттың атышулы кісі өлтіруінен кейін "Хуторский" ұйымдасқан қылмыстық тобының жетекшісі деп аталған Хасан Қасымбаев туралы сөз болды. Кейінірек Қасымбаев әлеуметтік желіде өзі туралы тараған ақпарат жалған екенін айтқан видео хабарлама жазды.
"Адамдар мені "Хуторские" ұйымдасқан қылмыстық тобының жетекшісі деп айыптайды, мен ешқандай заңсыз әрекетпен айналысатын топпен байланысым жоқ деп ресми түрде мәлімдеймін. Мен сотталған емеспін және қылмыстық жауапкершілікке тартылған жоқпын. Бір сөзбен айтқанда, мен заң алдында тазамын", – дейді Хасан.
12 қазанға қараған түні марқұм жасөспірімнің отбасының үйі өртеніп кеткен. Осы оқиғадан кейін бірден оқиға орнында жедел штаб құрылып, отбасы қорғауға алынды. Шерзат Полатты өлтіру фактісі бойынша ҚР Қылмыстық кодексінің бес бабы бойынша тергеу жүріп жатыр, 11 күдікті қамауға алынды.
