Павлодарда педофил 20 жылға сотталды

Сурет: Zakon.kz

Павлодар облысы қылмыстық істер жөніндегі мамандандырылған ауданаралық соты зорлау фактісі бойынша қылмыстық іс қарады, деп хабарлайды Zakon.kz.

Соттың баспасөз қызметінің хабарлауынша, істің мән-жайын заңмен жария ету мүмкін болмағандықтан, іс жабық сот отырысында қаралды.

Күдіктінің кінәсі кәмелетке толмаған жәбірленушінің, куәлардың айғақтарымен, сот сараптама қорытындыларымен және сотта зерттелген басқа да дәлелдемелермен дәлелденді.

Прокурор күдіктіні түпкілікті 20 жыл бас бостандығынан айыру түріндегі жазаны тағайындауды сұрады. Іс бойынша жәбірленуші тарап мемлекеттік айыптаушыны толық қолдап, азаматтық талапты қанағаттандыруды талап етті.

Сотталушы ҚК-тің 120-б. 3-1-б. 1-т. бойынша кінәсін мойындамады, ҚК-тің 121-б. 3-1-б. 1-т. бойынша кінәсін ішінара мойындады.

"О.-ның жасаған қылмыстары үшін заңда негізгі жаза ретінде тек 15 жылдан 17 жылға дейінгі мерзімге бас бостандығынан айыру көзделген. Сот О.-ның масаң күйде екі аса ауыр қылмыс жасағанын ескерді. Ол бұрын сотталған, сондықтан оның әрекеті қылмыстардың қауіпті қайталануы деп танылды. Осыны ескере отырып, О.-ға қылмыстардың жиынтығы бойынша түпкілікті 20 жылға бас бостандығынан айыру жазасы тағайындалды.Сондай-ақ О. өмір бойына педагогикалық және кәмелетке толмағандармен жұмыс істеуге байланысты лауазымдарды атқару құқығынан айырылды", - делінген сот үкімінде.

Жәбірленушінің пайдасына жалпы сомасы 7 000 000 теңге моральдық зиян өндірілді.

Үкім заңды күшіне енген жоқ.

Оқи отырыңыз