Үштөбеде полиция қызметкерлері блогерді ұстады

Жетісу облысының Үштөбе қаласында полиция қызметкерлері ақша бопсалаған жергілікті блогерді ұстады, деп хабарлайды Zakon.kz.

Полицияның хабарлауынша, ол қала тұрғындарына арналған үйлерді салумен айналысатын кәсіпкерден бұрын түсірілген сапасыз құрылыс туралы бейнероликті, әлеуметтік желідегі өз парақшасынан өшіру үшін және бұдан былай бейнематериалдарды жарияламауға әрі таратпауға уәде беріп, 10 млн теңге бопсалады деген күдікке ілінді.

Нәтижесінде Жетісу облысы полиция департаментінің ұйымдасқан қылмысқа қарсы күрес басқармасының қызметкерлері облыстық прокуратураның үйлестіруімен, күдіктіні талап етілген ақшалай қаражаттың бір бөлігі, яғни 7 млн теңгені алып жатқанда ұстады.

Аталған факт бойынша бопсалау бабымен қылмыстық іс қозғалды. Тергеу амалдары жүргізіліп, күдіктіге қатысты бұлтартпау шарасын таңдау мәселесі қаралып жатыр.

Тергеу мүддесіне байланысты басқа ақпарат жарияланбайды.