Вице-министр: Көктемгі су тасқыны кезеңіне 50% дайынбыз

"Су тасқыны кезеңіне 50% дайынбыз". Бұл туралы Су ресурстары және ирригация вице-министрі мәлімдеді.

Айтуынша, көктемгі маусымға дейін дайындық 100% жүргізіледі. Көршілес елдермен келіссөздер де оң нәтиже беріп жатыр. Ресей, Қытай, Қырғызстан мемлекеттерімен тұрақты байланыс үшін арнайы жұмыс тобы құрылды, деп жазады qazaqstan.tv.

Сондай-ақ, жақында "Тасқын" ақпараттық жүйесі іске қосылады. Онда елдегі 135 өзен бойынша нақты болжамдар жарияланады. Республика көлемінде 400-ге жуық бөгеттер жөнделіп, 84 елдімекенде қорғаныс бөгеттері тұрғызылды.

Ал су қоймаларына бұрын-соңды болмаған реконструкция жасалып жатыр. Нақтырақ айтсақ, 3 су қоймасы күрделі жөндеуден өткен. Ал "Астана" және Шығыс Қазақстандағы "Қандысу" қоймаларын қайта жаңғырту үшін дайындық жұмыстары қызу жүргізіліп жатыр.