Синоптиктер: 4 ақпандағы ауа райы құбылысын солтүстік антициклон анықтайтын болады

Синоптиктер алдағы сейсенбіде, 2025 жылы 4 ақпанда Қазақстанда жалпы қандай ауа райы күтілетінін айтты, деп хабарлайды Zakon.kz.

"Қазгидромет" РМК деректері бойынша республикамыздың басым бөлігі солтүстік антициклонның ықпалында болады, осыған байланысты ауа райы, негізінен, жауын-шашынсыз болады деп күтіледі.

"Еліміздің батысында, оңтүстік-батысында ғана фронтальды бөліктердің жүруіне байланысты жауын-шашын (жаңбыр мен қар) болады. Қазақстан бойынша өңірлерге тән ортақ табиғи құбылыс - тұман, көктайғақ, жел күшеюі болмақ, сондай-ақ шығыс өңірде қар жауып, жаяу бұрқасын жүреді деп күтіледі", делінген болжамда.

Бұған дейін синоптиктер Қазақстан бойынша 2025 жылғы ақпан айына арналған ауа райы болжамын ұсынған болатын. Оған сәйкес, қыстың соңғы айында елімізде жауын-шашын, аяз болып, температураның күрт өзгеруі күтіледі.