Шымкенттегі көп балалы аналар 20 мың теңгеге жуық жәрдемақы алады

Шымкентте көп балалы аналарға 8 наурыз мерекесі қарсаңында біржолғы әлеуметтік жәрдемақы беріледі. Бұл туралы 2025 жылдың 21 ақпанында қала әкімдігі мәлімдеді, деп хабарлайды Zakon.kz.

Билік өкілдерінің мәліметінше, биылғы 1 ақпандағы жағдай бойынша мегаполисте 67 741 көп балалы ана тұрады ("Алтын алқа", "Күміс алқа" алқаларымен марапатталған 13 805 және 4-5 балалы 53 936 көп балалы ана).

"Шымкент қаласы мәслихатының шешіміне сәйкес, 8 наурыз – Халықаралық әйелдер күніне орай "Алтын" және "Күміс" алқа иегерлері, "Батыр ана" атағын алған, І және ІІ дәрежелі "Ана даңқы" ордендерімен наградталған аналарға 5 АЕК мөлшерінде бір реттік әлеуметтік төлем жасалады." Шымкент қаласы әкімінің баспасөз қызметі

Бір реттік әлеуметтік төлем үшін көпбалалы аналардың тізімі "Азаматтарға арналған үкімет" Мемлекеттік корпорциясы КЕАҚ базасынан алынады.