ҚБТУ мемлекет меншігіне қайтарылды

Қазақстан-Британ техникалық университеті (ҚБТУ) қазір мемлекетке тиесілі, деп хабарлайды Zakon.kz.

Бұл туралы қаржылық есептілік депозитарийінде жарияланған ақпараттан белгілі болды. Бұдан шығатыны, ҚБТУ-дың жаңа иесі 2025 жылғы 27 ақпаннан бастап "Қайтарылған активтерді басқару жөніндегі компания" ЖШС болып табылады, оның жалғыз құрылтайшысы және қатысушысы ҚР Үкіметі.

"Қазақстан-Британ техникалық университеті" АҚ Қазақстан Үкіметінің 2001 жылғы 3 тамыздағы қаулысымен құрылды. Қазақстан тарапынан ҚР Үкіметі Білім және ғылым министрлігі құрылтайшы болды, Британ тарапынан Ұлыбританияның Қазақстандағы елшілігі мен Британ кеңесі серіктестері болды.

2003 жылдан бастап "ҚБТУ" АҚ жалғыз акционері "ҚазМұнайГаз" ҰҚ"АҚ болды (ҚР Үкіметінің 26 қыркүйектегі қаулысы).

2018 жылы ҚР Үкіметінің 30.12.2015 жылғы №1141 қаулысымен бекітілген жекешелендіру бағдарламасын орындау шеңберінде Қазақстан-Британ техникалық университетінің акциялар пакетін "Нұрсұлтан Назарбаевтың білім қоры" қоғамдық қоры сатып алды.

Бұл ретте, Мемлекет басшысы Қасым-Жомарт Тоқаев "Заңсыз сатып алынған активтерді мемлекетке қайтару туралы" ҚР Заңына 2023 жылғы 12 шілдеде қол қойды. Сол жылдың қыркүйек айында Үкіметтің қаулысымен "Қайтарылған активтерді басқару компаниясы" ЖШС құрылды.

Компания қызметінің мәні ретінде "Заңсыз сатып алынған активтерді мемлекетке қайтару туралы" заңда және республиканың басқа да заңдарында белгіленген тәртіппен қайтарылған активтерді басқару, олардың сақталуын қамтамасыз ету, сату айқындалған.

Бұған дейін Алматыда 2025 жылғы 12 қаңтарға қараған түні Қазақстан-Британ техникалық университетінің ғимараты өртенгендігі хабарланған болатын.