Ертіс өзені маңында ағаштарды заңсыз кескен бес тұрғын ұсталды

Павлодар облысында заңсыз ағаш кесу фактісі тоқтатылды, деп хабарлайды Zakon.kz polisia.kz-ке сілтеме жасап.

Павлодар облысының тәртіп сақшылары Ертіс өзенінің жайылмасында ағаштарды заңсыз кескен Ақсу қаласының бес тұрғынын ұстады.

"Орман ресурстарын қорғау заңнамасын өрескел бұзу дерегі бойынша қылмыстық іс қозғалды. Қажетті сараптамалар тағайындалды. Заңсыз ағаш кесу – қоршаған ортаға орасан зор залал келтіретін ауыр құқық бұзушылық. Бұл әрекеттер аймақтың экожүйесіне елеулі зиян тигізеді", - деді Павлодар облысы полиция департаменті.

Құқық қорғау органдары оқиғаның барлық мән-жайларын анықтап, заңсыз кәсіпке қатысы бар өзге тұлғаларды анықтау және олардың жолын кесу бағытында жұмыстарды жалғастырып жатыр.