Спорт жаңалықтары 
Жастарға ерекше көңіл бөлінеді: ҚХА төрағасының жаңа орынбасары Ассамблеяның тиімділігі жайлы сөз қозғады
Сурет: Facebook/Rasul Ahmetov
Оның айтуынша, келесі XXXIV сессиясында Ассамблеяның жұмысына жастармен және азаматтық қоғам институттарымен жаңа тәсілдерді енгізу мен жаңа жобаларды жүзеге асыруға ерекше назар аударылады. Сондай-ақ, халықаралық үдерістер тұрғысынан ҚХА-ның сыртқы қоғамдық дипломатияны дамытудағы рөлі, этномәдени бірлестіктердің тарихи отанымен өзара байланыстары, мәдени-гуманитарлық жобалар аясында талқылануы мүмкін.
"Өткен жыл Ассамблея үшін нақты жетістіктер жылы болды. Барлық құрылымдық бөлімшелердің – ақсақалдар кеңесінің, аналар кеңесінің, медиация қызметінің және жастар ұйымының жұмысымен Ассамблеяның халық бірлігі мен конструктивті диалог алаңы ретіндегі рөлі нығайтылды. Тіл саясатын дамыту, жастар бастамаларын қолдау және Қазақстанның мәдени мұрасын сақтау бағытында жобалар сәтті жүзеге асырылды. Айта кету керек, "Ассамблея жастары" жастар ұйымы еліміздің ең белсенді жастар ұйымы болып танылды. Өңірлердегі этномәдени бірлестіктердің жұмысы да ерекше атап өтілді. Олардың азаматтар арасында сенім мен өзара түсіністікті нығайтудағы үлесін асыра бағалау мүмкін емес. Осылайша, ҚХА елдің саяси модернизациясында, ұлттық бірлікті нығайтудың, реформаларды қоғамдық қолдаудың және барлық этностарды мемлекеттік стратегиялық даму процесіне тартудың маңызды рөлін атқарды", – дейді Расул Ахметов.
Ол сондай-ақ Ассамблеяның қызметінің ауқымын нақты көрсетті: 2024 жылы ғана 9 мыңнан астам іс-шара өткізіліп, олар еліміздің түкпір-түкпірінен 700 мыңнан астам азаматты қамтыған. Бұл шараларға мәдени фестивальдар, диалог алаңдары, білім беру семинарлары, форумдар мен конференциялар кірді, олардың барлығы этносаралық келісімді нығайтуға бағытталған. Барлық жас топтары мен этностардың өкілдері белсене қатысады, бірақ ерекше көңіл жастарға бөлінеді: "Ассамблея жастары" ұйымы жас ұрпақтың толеранттылық пен азаматтық жауапкершілік құндылықтарын қалыптастыруға бағытталған бастамаларды жүзеге асырады.
"Қазақстан Халық Ассамблеясы – қоғамдық келісім мен ұлттық бірлікті жүзеге асырудағы мемлекеттік саясаттың маңызды құралы. Ол мемлекет пен азаматтық қоғам арасындағы өзара әрекеттестікті қамтамасыз етіп, инклюзивті және толерантты қоғамдық кеңістікті қалыптастыруға ықпал етеді. Ассамблея заңнамалық бастамалар бойынша ұсыныстар әзірлеуге белсене қатысады, қоғамдық институттармен жұмыс істейді және Мемлекет басшысы Қасым-Жомарт Тоқаевтың саяси және экономикалық реформалар аясындағы стратегиялық бастамаларын қолдайды. Оның қызметі билікке деген сенімді нығайтып, елдің дамуында тұрақты негіз қалайды", – деп санайды спикер.
Оның айтуынша, Ассамблея белсенді түрде форумдар мен халықаралық конференциялар өткізіп, тәжірибе алмасады. Осы арқылы Қазақстанның этносаралық диалог пен қоғамның тұрақты дамуының үлгісі ретінде танымалдылығын арттыруға қол жеткізуде.
Айта кетейік, 2025 жылғы 17 сәуірде Қазақстан халқы Ассамблеясы (ҚХА) төрағасының екі жаңа орынбасары тағайындалған болатын. Жаңа қызметке Расул Ахметов пен Дмитрий Останкович келді. Бұл ретте, президент өкімімен 2025 жылғы 20 наурызда ҚХА кезекті сессиясы шақырылды. Кезекті XXХІV сессия 2025 жылғы 23-24 сәуір күндері Астана қаласында өтеді.
