"Таза Қазақстан" – бұл шын мәнінде нағыз отансүйгіштіктің көрінісі

Мемлекет басшысы Қасым-Жомарт Тоқаев 2025 жылғы 24 сәуірде Қазақстан халқы Ассамблеясының ХХХІV сессиясында "Таза Қазақстан" акциясына тоқталып өтті, деп хабарлайды, Zakon.kz.

Президент қастерлі Отанымызды көркейту – баршаға ортақ парыз екенін баса айтты.

"Менің бастамаммен былтырдан бері "Таза Қазақстан" акциясы жүзеге асырылып жатыр. Жалпыұлттық жобаға 6 миллионнан астам адам қатысты. 1,6 миллион тоннадан аса қоқыс жиналды. 3,3 миллион көшет отырғызылды. "Таза Қазақстан", бұл – біздің бүгінгі және ертеңгі күніміздің кепілі. Сондықтан жұмыс үздіксіз жалғаса береді",- деді ол.

Мұнымен қоса, әр азаматтың, әсіресе, жастардың бойына тазалық, ұқыптылық, жауаптылық сияқты қасиеттерді сіңіруіміз керек екенін қоса айтты.

"Таза я тазалық, бұл – киелі сөздер. Ары таза адам ешқашан елін сатпайды. Біз "Қазақстан – ортақ үйіміз" деп үнемі айтамыз. Сондықтан еліміз таза, тартымды, мәдениетті болуы керек. Ассамблея бұл идеяны жан-жақты дәріптеп келеді. Бұл – өте тиімді әрі пайдалы жұмыс. Тазалық әр үйден басталуы керек. Сонда ғана "Таза Қазақстан" боламыз". Қасым-Жомарт Тоқаев

Оның айтуынша, кішкентай кезінен тазалыққа үйренген бала кейін жауапкершілігі жоғары, саналы азамат болып өседі. Елге жанашыр болады.

"Сондықтан бүгін мен Қазақстан халқы Ассамблеясының мүшелерін, барлық этномәдени бірлестіктерді "Таза Қазақстан" жалпыұлттық акциясына белсене қатысуға шақырамын. Бұл – жай науқан емес, бұл – өскелең ұрпаққа озық білім мен тәлім-тәрбие беру деген сөз.Баршамызға қатысы бар идеологиялық маңызды іске әр қаланың, ауылдың, көшенің және ауланың тұрғындарын жұмылдыру керек. "Таза Қазақстан", бұл – шынайы отаншылдықтың көрінісі. Бәріміз Әділетті, Қауіпсіз және Таза Қазақстанда өмір сүргіміз келеді",- деді мемлекет басшысы.

Бұған дейін түлектердің 80 пайызы Ұлттық бірыңғай тестілеуді мемлекеттік тілде тапсыратындығы жайлы хабарланған болатын.