Павлодарда қарағайлы орман резерватының қызметкерлері сотталды

Павлодарда қарағайлы орман резерватының қызметкерлері пара алу және ағаш ұрлау фактілері бойынша кінәлі деп танылды. Оларға бүгін, 25 сәуірде сот үкімі шықты. Толығырақ ақпаратта.

Құқық қорғау органдарының мәліметінше, 2022 және 2023 жылдары мемлекеттік орман табиғи резерватына 153 миллион теңге көлемінде залал келтірілген. Бұл үшін ағаш кесу туралы нарядтарда іскерлік ағаштардың санаты отындық ағашқа төмендетіліп, кейбір кәсіпкерлерге сату кезінде көлемі азайтылған. Мұндай заңсыз әрекеттер үшін "Ертіс орманы" резерватының бас директоры мен кейбір қызметкерлері пара алған.

Сондай-ақ, айыптау актісінде қорық қызметкерлерінің құжаттарды бұрмалау арқылы заңсыз ағаш кесумен айналысқан орманшыларды жауапкершіліктен жалтаруға көмектескені де көрсетілген.

2024 жылдың басында құқық қорғау органдары аталған заңсыз әрекеттерді тоқтатты.

Нәтижесінде бес адам қылмыстық жауапкершілікке тартылды. Бүгін, 25 сәуір күні, олардың төртеуі, оның ішінде мемлекеттік резерваттың бұрынғы бас директоры, ұрлық, парақорлық, сондай-ақ қылмыстық топ құру және оған қатысу баптары бойынша кінәлі деп танылды.

"Мемлекеттік орман табиғи резерватының бұрынғы бас директорына 12 жыл бас бостандығынан айыру жазасы тағайындалды. Өндірістік учаске жұмысшысы, мемлекеттік инспектор және аңшылық маманның әрқайсысына 10 жыл мерзімге бас бостандығынан айыру жазасы белгіленді." Павлодар облыстық мамандандырылған ауданаралық қылмыстық істер сотының судьясы Нұрлан Айтбаев

Сонымен қатар, тергеу барысында белсенді ынтымақтастық танытқан тағы бір сотталушы ұрлық үшін кінәлі деп танылып, үш жылға бас бостандығынан айырылды.

Сот үкімі бойынша сотталғандардың кейбір мүлкі мемлекет пайдасына тәркіленді. Бұдан бөлек, олар "Ертіс орманы" мемлекеттік орман табиғи резерватының талап-арызы бойынша мемлекетке 120 миллион теңгеден астам материалдық залалды өтеуге міндеттелді.

Сот үкімі заңды күшіне енген жоқ