Спорт жаңалықтары 
Астана банкінің бұрынғы басшысы сырттай 10 жылға сотталды
Сурет: "Астана Банкі" АҚ
Спикердің айтуынша, 22 сәуірде Астана қаласының Қылмыстық істер жөніндегі ауданаралық соты "Астана Банкі" АҚ-ның бұрынғы басшылары мен қызметкерлеріне қатысты айыптау үкімі шығарды.
"Сот "Астана Банкі" АҚ директорлар кеңесінің бұрынғы төрағасы және мажоритарлық акционері Тоқтаровты банкроттыққа дейінгі кезеңде агенттік қызмет көрсету желеуімен Алматы қаласындағы бизнес орталығын бақылаудағы компанияның пайдасына заңсыз иеліктен шығару және ұрлық жасағаны үшін кінәлі деп таныды", – деді Биғайдаров.
Олжас Тоқтаров тұрғын үй, әкімшілік, өндірістік нысандар, ғимараттар, жер телімдері, бағалы қағаздар мен криптовалюта түріндегі жалпы сомасы 14 миллиард теңгеден астам мүлкі тәркіленіп, сырттай 10 жылға бас бостандығынан айырылды.
"Астана Банкі" АҚ филиалының, департаментінің және басшылығының бұрынғы басшыларының арасынан оның қарамағындағы қызметкерлері де кінәлі деп танылды. Олардың қылмыстық қудалау органымен және сотпен ынтымақтастығын, кінәсін мойындап, заңсыз әрекеттерді ашуға көмектескенін ескере отырып, сот оларға бас бостандығынан айырумен байланысты емес жаза тағайындады", – деп жалғастырды спикер.
Үкім заңды күшіне енген жоқ.
Биғайдаров сонымен қатар сот тәркілеген мүліктің параллель жүргізілген қаржылық тергеу нәтижелері бойынша тергеу барысында анықталғанын қосты.
"Жиналған материалдар сотталушының активтерге нақты иелігін дәлелдеді, олардың бір бөлігі үлестес тұлғаларға тіркелген. Мемлекет басшысының тапсырмасын орындау мақсатында заңсыз алынған активтерді қайтару және келтірілген залалды өтеу бойынша жұмыстар жалғасуда", – деп толықтырды Сыбайлас жемқорлыққа қарсы іс-қимыл өкілі.
Сондай-ақ ол 2022 жылдан бастап бүгінгі күнге дейін сыбайлас жемқорлыққа қарсы қызмет 1 триллион 130 миллиард теңгеден астам сомаға мүліктік активтер мен ақшаны мемлекетке қайтаруды қамтамасыз еткенін айтты. Активтердің едәуір бөлігі шетелден қайтарылды. Мұндай активтердің жалпы сомасы 670 миллионнан астам АҚШ долларын құрады. Бұл шамамен 300 миллиард теңге. Бұған Австрия, Лихтенштейн, Біріккен Араб Әмірліктері және Түркиядан қайтарылған ақша кіреді.
