Мемлекет басшысы Рим Папасы XIV Левке құттықтау жеделхатын жолдады

Қасым-Жомарт Тоқаев Рим Папасы XIV Левті Қазақстан халқының атынан құттықтады, деп хабарлайды Zakon.kz.

"Сізді Киелі Тақ иесі етіп сайлау арқылы Католик шіркеуі халықаралық ахуал күрделі кезеңде бейбітшілік пен тұрақтылықты дәріптеу ісінде маңызды рөл атқара беретініне сенімдімін", - деп жазылған жеделхатта. 

Президент әртүрлі діни наным өкілдері мекен ететін Қазақстанға Рим Папасы екі мәрте сапармен келгеніне назар аударып, халықтар достығын, дінаралық сенім мен ынтымақты нығайтуға бағытталған ортақ күш-жігерді еліміздің әрдайым қолдайтынын жеткізді.

Еске салайық, бұған дейін АҚШ-та туған Роберт Прево жаңа Рим Папасы болғанын жазған едік. Ол тарихтағы алғашқы америкалық понтифик атанды.