Қазақстанда 2025 жылы Ислам Даму Банкінің қаржыландыруымен төрт су қоймасының құрылысы басталады

Қазақстанның Су ресурстары және ирригация министрі Нұржан Нұржігітов 2025 жылғы 12 мамырда Мәжілістегі Үкімет сағатында еліміздегі су ресурстарын тиімді басқаруда қандай жұмыстар атқарылып жатқанын айтты, деп хабарлайды Zakon.kz.

Министрдің айтуынша, 2025 жылы су шаруашылығы саласында жалпы құны 184 млрд теңге болатын 138 жобаны іске асыру жоспарланған. Олардың ішінде 31 жоба Ақмола, Атырау, Алматы, Қызылорда, Түркістан, Батыс Қазақстан, Солтүстік Қазақстан, Маңғыстау және Ұлытау облыстарында су шаруашылығы нысандарын салу және қайта жаңғыртуға бағытталған. Бұл мақсаттарға 2025 жылы 71 млрд теңге бөлінеді.

"Аталған жобалар аясында 2,5 мың шақырымнан астам су құбыры салынып, шамамен 1,3 миллион тұрғыны бар 468 елді мекенді сумен қамтамасыз ету көзделіп отыр. Сонымен қатар, 214 жоба бойынша жобалық-сметалық құжаттама мен техникалық-экономикалық негіздеме әзірленуде. Барлық жобалар су ресурстарын тиімді пайдалануды және автоматтандыру элементтерін қамтиды. Көптеген жобалардың құжаттамасын әзірлеу осы жылы аяқталады деп жоспарлануда", – деп түсіндірді Нұржігітов.

Сонымен қатар, министрдің айтуынша, жобаларды іске асыруға инвесторларды тарту бойынша жұмыстар жүргізілуде.

"Бүгінде Ислам Даму Банкінің директорлар кеңесінің жалпы сомасы 2,7 млрд долларға қарыз және грант беру туралы мақұлдауы бар. Жоба екі кезеңде жүзеге асырылады. Бірінші кезеңде 2025 жылы төрт жаңа су қоймасын салу жоспарланған. Олардың үшеуі – Ақмола, Қалғұты және Қараөзек – оңтүстік өңірлерде орналасып, 22,5 мың гектар жаңа суармалы жерлерді сумен қамтамасыз етуге бағытталған. Төртінші су қоймасы – Батыс Қазақстан облысындағы Үлкен Өзен өзенінде (28 млн м³) – су тасқыны мен еріген суды ұстап тұрып, Қазталов ауданының екі елді мекенін (шамамен 5 мың адам) су басу қаупінен қорғауға арналған",-деді ол.

Екінші кезең 2027 жылдан бастап жүзеге асырылады және 25 жобаны қамтиды, оның ішінде 13 су қоймасын салу және 11-ін қайта жаңғырту жоспарланған.

Бұған дейін елімізде суармалы суға жаңа тарифтер әзірленуде екенін жазған болатынбыз.