Қандай жеке деректер жалпыға қол жетімді - министрлік түсіндірмесі

Ақпараттық қауіпсіздік комитетінде ЦДИАӨМ қандай дербес деректердің жалпыға қолжетімді және қолжетімділігі шектеулі екенін түсіндірді, деп хабарлайды Zakon.kz.

Белгілі болғандай, "Дербес деректер және оларды қорғау туралы" заңның 6-бабына сәйкес, дербес деректер қолжетімділігіне қарай жалпыға қолжетімді және шектеулі қолжетімді деп бөлінеді.

"Жалпыға қолжетімді дербес деректер – бұл дербес деректер немесе Қазақстан Республикасының заңдарына сәйкес құпиялылықты сақтау талаптары қолданылмайтын, субъектінің келісімімен қолжетімді болатын мәліметтер", – деп түсіндірді комитет.

Шектеулі қолжетімді дербес деректер – бұл Қазақстан Республикасының заңнамасына сәйкес қолжетімділігі шектелген деректер. Мысалы, мұндай шектеулі қолжетімді дербес деректерге жеке, отбасылық, салықтық, банктік, коммерциялық, медицина қызметкерінің құпиясы және басқа да заңмен қорғалатын құпия, сондай-ақ құпиялылық белгісі бар, дербес деректерді қамтитын кез келген мәліметтер жатады.

Мысалы, аты-жөні, ЖСН және электрондық пошта бөлек пайдаланылғанда жалпыға қолжетімді дербес деректер болып табылады. Алайда аты-жөні, ЖСН және электрондық пошта қаржылық құпиямен, медицина қызметкерінің құпиясымен немесе басқа да заңмен қорғалатын құпиямен бірге қолданылса, олар шектеулі қолжетімді дербес деректер болып саналады.

Сонымен қатар, ведомство телефон нөмірі қосымша мәліметтермен (толық аты-жөні, ЖСН және т.б.) байланыстырылмаған жағдайда нақты жеке тұлғаны анықтауға мүмкіндік бермейтінін және, тиісінше, дербес деректер болып саналмайтынын атап өтті.