Күші таусылған: Алматы облысының тауларында туристер құтқарылды

Төтенше жағдайлар министрлігінің құтқарушылары үш мың метр биіктіктен төрт ер адамды эвакуациялады. Туристер Шымбұлақ шыңынан өз бетімен түсе алмаған, деп хабарлайды Zakon.kz.

Қоңырау құтқарушыларға 31 мамыр кешке түскен. Көмек Алматы облысы Талғар ауданында жүрген 24 және 25 жастағы төрт ер адамға қажет болған.

"Шымбұлақ шыңынан 3 450 метр биіктіктен түсіп келе жатқанда туристер өз күшін дұрыс есептемей, құрысу белгілері пайда болған соң 112 нөміріне хабарласқан. Геолокацияны жолдаған соң, олар құтқарушыларды күтіп қалған", - деп мәлімдеді ТЖМ баспасөз қызметі.

Құтқару тобы шұғыл түрде Медеу бекетінен аттанып, Безымянное шатқалына жеткен соң, туристер жіберген координаталар бойынша жаяу жолын жалғастырған.

Тәуліктің қараңғы уақытында таулы аймақты шектеулі көрініспен өткере отырып, тәжірибелі мамандар әлсіз туристерді тауып, оларды "Шымбұлақ" таулы шаңғы курортына дейін аман-есен эвакуациялады.