Антикор сотталып шыққан Мұсайбековтің жаңа қызметке тағайындалуына қатысты пікір білдірді

2025 жылғы 30 маусымда Сыбайлас жемқорлыққа қарсы іс-қимыл агенттігінің ресми өкілі Данияр Биғайдаров Мәдениет және спорт экс-вице-министрі Сәкен Мұсайбековтің "Барыс" хоккей клубының бас директоры болып тағайындалуына қатысты түсінік берді, деп хабарлайды Zakon.kz.

Данияр Биғайдаровтың айтуынша, Мұсайбеков бұған дейін алаяқтық үшін сотталған.

Ол кезде Қылмыстық кодекстің 189-бабының 4-бөлігі ("Аса ірі көлемдегі алаяқтық") сыбайлас жемқорлық қылмысы болып есептелмеген.

"Қазір 189-баптың 4-бөлігі – Сыбайлас жемқорлыққа жатқызылған. Енді осы бап бойынша сотталған адамдар ешқандай лауазымды қызмет атқара алмайды. Оларға мемлекеттік қызметте, квазимемлекеттік секторда және басқа да орындарда жұмыс істеуге өмір бойына тыйым салынады", - деді Данияр Биғайдаров.

Оның айтуынша, бұл заңнама 2022 жылы Антикордың бастамасымен өзгертілген.

Еске салайық, 2025 жылғы 18 маусымда Сәкен Мұсайбековтің "Барыс" клубының бас директоры болып тағайындалғаны хабарланған еді.