Алматыдағы қылмыстық схема: мемлекетке келтірілген шығын 33 миллиард теңгеден асты

Алматы прокуратурасы қылмыстық топтың әрекетін тоқтатты. Толық ақпаратпен бүгін, 2025 жылдың 4 шілдесінде қадағалау органының баспасөз қызметі бөлісті, деп хабарлайды Zakon.kz.

Алматы қаласының прокуратурасы жүргізген тексеру нәтижесінде жалған құжаттар мен кедендік сәйкестендіру құралдарын пайдалана отырып, тауарларды кедендік шекара арқылы өткізу, сондай-ақ нақты орындалмаған жұмыстардың, көрсетілмеген қызметтердің және тиелмеген тауарлардың шот-фактураларын жазып беру фактілері анықталды.

Жиналған материалдар бойынша бірқатар қылмыстық істер тіркелген, онда "кеден саласындағы уәкілетті экономикалық операторлар" компанияларының басшылары күдікті ретінде өткен.

Құқыққа қарсы әрекетті жүзеге асыру кезеңінде мемлекетке келтірілген залалдың жалпы сомасы 33 миллиард теңгеден асты.

"Сот үкіміне сәйкес айыпталушылар Қылмыстық кодексінің 216, 234-баптары бойынша кінәлі деп танылды." Алматы қаласының прокуратурасы

Кінәлі адамдарға мүлкі мемлекет кірісіне тәркіленіп, екі жылдан жеті жылға дейінгі мерзімге бас бостандығынан айыру түріндегі жазаның әртүрлі мерзімдері тағайындалды.

Апелляциялық саты үкімді күшінде қалдырды.