Теміржол – жайылым емес: Қазақстанда мал иелері жауапқа тартылып жатыр

Қазақстанда биыл темір жол бойында 893 рет пойыз шұғыл тоқтауға мәжбүр болды. Оның 660-нан астамы жолда жүрген малдың кесірінен болған, деп хабарлайды Zakon.kz.

Полицияның хабарлауынша, бұл – тек малдың мерт болуына емес, жолаушылардың өміріне қауіп, поезд қозғалысының бұзылуы және экономикалық шығын деген сөз.

Кейінгі тәуліктің өзінде Ақмола, Алматы, Жамбыл және Жетісу облыстарында пойыз жылқыны қағып кеткен, Қызылорда мен Алматы облыстарында ірі қарамен жүк пойызының соқтығысуы тіркелген.

Барлық жағдайда мал иелері анықталып, заңнамаға сәйкес жауапкершілікке тартылды.

"Теміржол — аса қауіпті аймақ. Оның маңында мал жаюға заңмен тыйым салынған. Мұндай әрекет қайғылы оқиғаларға себеп болуы мүмкін", - делінген хабарламада.

Көлік полицейлері мал иелеріне жайылым тәртібін қатаң сақтауды ескертті.