Air Astana Алматыдан ұшатын жолаушыларға маңызды ескерту жасады

Қазақстандық Air Astana әуе компаниясы 2026 жылғы 3 қарашада жолаушыларына маңызды ақпаратпен бөлісті. 6 қарашадан бастап Алматы әуежайындағы Т-1 терминалында ішкі рейстерге тіркелу қайта басталады, деп хабарлайды Zakon.kz.

Бұл туралы әуе компаниясының Telegram-арнасында жарияланды.

"2026 жылғы 6 қарашадан бастап сағат 04:00-ден бастап Алматыдан ұшатын Air Astana әуе компаниясының ішкі рейстеріне жолаушыларды тіркеу Алматы халықаралық әуежайының Т-1 терминалында қайта жүзеге асырылады", – делінген хабарламада.

Air Astana компаниясының жерүсті қызмет көрсету жөніндегі вице-президенті Александр Небоганың айтуынша, Т-1 терминалында ауқымды реконструкция жұмыстары жүргізілген. Оның пікірінше, заманауи инфрақұрылым, жаңартылған қызметтер мен ыңғайлы навигация жолаушылардың әуежайда болуын жайлы етіп, ұшар алдындағы рәсімдерден жылдам өтуіне мүмкіндік береді.

Алматы әуежайын ауқымды жаңғырту аясында Т-1 терминалындағы тіркеу аймақтары жаңартылды. Олардың дизайнында заманауи сәулеттік шешімдер мен Қазақстанның мәдени ерекшеліктері үйлесім тапқан. Ұшар алдындағы рәсімдерді жеделдету үшін әуежайда жолаушылар мен отырғызу құжаттарын тексеретін бес автоматтандырылған пункт орнатылды. Ұшу аймағындағы жолаушылар орындықтарының саны көбейтіліп, цифрлық ақпараттық таблолар жаңартылды және бірнеше тілде жұмыс істейтін заманауи навигация жүйесі енгізілді.

Сонымен қатар балалар ойын алаңдары, багаж беру аймағы және басқа да нысандар жаңғыртылды.

"Осылайша, 6 қарашадан бастап Air Astana әуе компаниясының ішкі рейстеріне тіркелу Т-1 терминалында, ал халықаралық рейстерге тіркелу Т-2 терминалында жүзеге асырылады", – деп түсіндірді әуе компаниясы.

Сондай-ақ Air Astana жолаушыларға ұшар алдындағы барлық рәсімдерден уақытылы өту үшін әуежайға алдын ала келуге кеңес береді.

Айта кетейік, бұған дейін, 2026 жылғы 29 қазанда Қазақстанда ұшақ бортында жоғары жылдамдықты Wi-Fi қызметі іске қосылғаны хабарланған болатын.