Бірі тоқтап тұрған, екіншісі соғып кеткен: Алматыда екі автобус соқтығысты

Алматыда ірі даңғылдардың қиылысында екі автобус соқтығысты. Қазір полиция оқиғаның мән-жайын анықтап жатыр, деп хабарлайды Zakon.kz.

Қоғамдық көліктердің соқтығысқаны туралы ақпарат әлеуметтік желілерде тарады. Threads желісіндегі куәгерлердің жазуынша, Абай мен Момышұлы даңғылдарының қиылысында №78 және №136 бағыттағы автобустар соқтығысқан.

Алматы полиция департаментінің баспасөз қызметі оқиғаға қатысты түсініктеме беріп, апаттың мән-жайын нақтылады.

Ведомствоның мәліметінше, жол апаты 10 қарашада сағат 13:00 шамасында қаланың Әуезов ауданында болған.

"Абай даңғылымен шығыс бағытта келе жатқан SAZ маркалы автобустың жүргізушісі алдында өзімен бір бағытта тоқтап тұрған Golden Dragon маркалы автобуспен соқтығысқан", – деп хабарлады Алматы полиция департаментінің баспасөз қызметі Zakon.kz тілшісіне.

Полицияның хабарлауынша, жол апатынан ешкім зардап шекпеген. Аталған дерек бойынша тергеу басталды.

"Қазір Әуезов аудандық полиция басқармасының қызметкерлері оқиғаның барлық мән-жайын анықтап жатыр", – делінген Полиция департаментінің хабарламасында.