Димаш Құдайберген Игорь Крутоймен байланысын үзген жоқ - продюсер
versiya.info
"ДимашӘли" шығармашылық орталығының ресми өкілі Назым Жанғазинова "Қазақстан әншісі Димаш Құдайберген мен ресейлік композитор Игорь Крутой арасындағы әріптестік байланыс үзілді" деген ақпаратты жоққа шығарды, деп хабарлайды zakon.kz Baignews.kz сайтына сілтеме жасап.
Димаш Пекиндегі компаниямен серіктесе жұмыс істейді. Одан бөлек музыкант АҚШ-тағы компания өкілдерімен, сонымен қатар Швеция, Ұлыбритания, Корея, Қытай, Франция, Ресей және басқа елдердің композиторларымен шығармашылық қарым-қатынас орнатқан.
Әншінің барлық продюсерлік жұмыстарымен "ДимашӘли" шығармашылық орталығы айналысады.
- Композитор Игорь Крутой мен Димаш Құдайберген арасында орнаған жылы әрі шығармашылық, достық қарым-қатынас бүгінгі күнге дейін жалғасып келе жатқанын атап өткім келеді. Игорь Крутоймен бірге өткізілетін барлық концерт 2020 жылдың жоспарланған кестесі бойынша өтеді, - деді Назым Жанғазинова.
Айта кетсек, ғаламторда Қазақстан әншісі Димаш Құайберген ресейлік композитор Игорь Крутоймен байланысын үзіп, Оңтүстік Кореяның продюсерімен жұмысын жаңадан бастайды деген ақпарат тараған еді.
