Құлсарыда балабақшаны ойрандаған оқушылардың ата-аналарына айыппұл салынды

Әлеуметтік желі, сурет - Zakon.kz жаңалық 29.10.2022 12:48

Сурет: видеодан алынды

Атырау облысының кәмелетке толмағандар істері жөніндегі соты Құлсары қаласындағы балабақшаны қиратқан мектеп оқушыларының ата-аналарына айыппұл салды, деп хабарлайды Zakon.kz.

Айта кетсек, оқыс оқиға қазан айының басында орын алып, оның видеосы әлеуметтік желіде тарады. Жылыой ауданының полицейлері 6-7-сыныптың алты оқушысының жергілікті балабақшаға кіргенін, есіктің әйнегін сындырып, гүлдерді, жиһаздарды, ойыншықтарды шашып, өрт сөндіргіштерді лақтырғанын анықтады.

Салдарынан жасөспірімдердің ата-аналары "Кәмелетке толмағандарды тәрбиелеу міндеттерін орындамағаны үшін" (ӘҚБтК-нің 127-бабы) әкімшілік жауапкершілікке тартылды.

"Ақ Жайық" басылымының хабарлауынша, ата-аналар балаларының кінәсін мойындап, ең төменгі айыппұл тағайындауды сұраған.

Кінәні мойындаған кезде сот әкімшілік айыппұл сомасын 30%-ға азайтуға құқылы. Сот құқық бұзушылықтың сипатын, заңды өкілдерінің жеке басын, олардың құқық бұзушылық жасалғанға дейінгі және одан кейінгі мінез-құлқын, сондай-ақ ауырлататын мән-жайлардың жоқтығын ескере отырып, оларға 21 441 теңге айыппұл түрінде әкімшілік жаза тағайындады, деп хабарлады баспасөз қызметі.

Сот қаулысы әлі заңды күшіне енген жоқ.

Оқи отырыңыз