Петропавлда тоғызыншы сынып оқушысы қатарластарына не себепті шабуыл жасағаны тексеріліп жатыр
Сурет: Zakon.kz
Петропавлдағы №4 мектепте болған төтенше жағдайдан кейін қаладағы ата-аналар чаттары арқылы бұл жағдайға "Лесоруб" ойыны себеп болуы мүмкін деген хабарламалар тарады.
Түсініктеме алу үшін Zakon.kz Солтүстік Қазақстан облысының прокуратурасына сауал жолдады. Қадағалаушы орган тергеу аясында әртүрлі нұсқа тексерілетінін мәлімдеді.
"Лесоруб" ойынына қатысты нұсқа тексеріледі. Тергеу аясында барлығы пысықталады. Қазір қажетті тексеру шаралары жүріп жатыр". Солтүстік Қазақстан облысы прокуратурасының аппарат басшысы Шолпан Әбдірахманова
Петропавлда 9-сынып оқушысы мектепке балта мен пышақ әкеліп, салдарынан үш бала зардап шекті. Кейін баланың жасы 15-те екені, "Депрессия" диагнозымен психиатриялық есепте тұратыны белгілі болды. Ол қаладағы №4 орта мектепте 2022 жылдың қараша айында ауысып келген. Оқу ісі меңгерушісінің айтуынша, тоғызыншы сынып оқушысы мүмкіндігінше оқыған, өзін сабырлы, салмақты ұстаған.
Оқу-ағарту министрлігі 13 ақпан күні Петропавлдағы төтенше жағдайдан кейін елдегі барлық мектептің қауіпсіздігі тексерілетінін хабарлады.
Төтенше жағдай болған Петропавл мектебінде күзет турникеттері мен металл іздегіштер болмаған.
Оқи отырыңыз
