БҚО-да облыстық JAIYQ JASTARY фестивалі өтпек
Сурет: assembly.kz
13 аталым бойынша өтетін фестиваль командалық сайыс түрінде ұйымдастырылмақ. Фестиваль облыс әкімдігінің қолдауымен, облыстық, қалалық және аудандық жастармен жұмыс жөніндегі ресурстық орталықтары, "AMANAT" партиясының жанындағы "Жастар рухы" ЖҚ БҚОФ, "Шабыт" шығармашылық бастамалар орталығының ұйымдастыруымен өтеді.
Жастар фестивалінің ұйымдастыру комитетінің шешімі бойынша фестивальде қатысушылар Тоғызқұмалақ, Үстел тенисі, Қазақ күресі, Үздік ақын, Эстрадалық ән, Хореография, Сурет салу, Дәстүрлі ән тағы басқа аталымдар бойынша бақ сынайтын болады.
Батыс Қазақстан облысында быил алғаш рет ұйымдастырылған фестивальге облыс бойынша 5 мыңға жуық жастар өтініш білдірген. Фестиваль талаптарына сәйкес қала және аудан, ауыл көлемінде іріктеу алдағы 10 күн бойы жүргізіледі. Ақтық сынға жүзден жүйрік, мыңнан тұлпар шыққан 13 команда (Орал қаласы және аудан жастарынан құралған) жастары жолдама алады.
Фестивальде өңір жастары арасында ұлттық құндылықтар дәріптеледі. Атап айтсақ спорт бойынша: "Қазақ күресі", "Тоғызқұмалақ", "Садақ атудан" сайыс, өнер бағытында: "Ұлттық би", "Дәстүрлі ән", "Үздік ақын", "Үздік аспапта орындау шебері" аталымында сайыс өтеді. "Үздік дәстүрлі ән" аталымында қатысушы домбырамен Батыс өңірінің композиторларынан ән немесе терме орындауы тиіс. "Үздік ақын" аталымында қатысушы Батыс Қазақстан облысының тәуелсіздік жылдарындағы жастарының жеткен жетістіктерін жырға арқау етуі тиіс, "Үздік суретші" аталымында жастар шаһардың көрікті келбетін қылқаламмен қағаз бетіне түсіріп, облыс тұрғындары мен қонақтарына арналған сурет көрмесін ұйымдастырады.
Жекелей, топтық бағыттар бойынша және жалпыкомандалық есепте жүлдегер атанған жастарға демеушілердің қолдауымен тағайындалған қаржылай сыйақы беріледі.
