"Менің де көңілім қалды": Тамара Дүйсенова Астана жәрмеңкесіндегі талас туралы айтты

Тамара Дүйсенова Астана жәрмеңкесіндегі талас туралы айтты, сурет - Zakon.kz жаңалық 29.08.2023 14:26

Сурет: akorda.kz

29 тамызда үкімет кулуарында Еңбек және халықты әлеуметтік қорғау министрі Тамара Дүйсенова Тәжікстан жәрмеңкесіндегі астаналықтардың өзін ұстау әдебі туралы айтты, деп хабарлайды Zakon.kz.

Журналистер министрден астаналықтардың тәжік жәрмеңкесінде жеміс-жидек пен көкөністерді алып кеткендегі тәртібіне баға беруін сұрады.

"Шынымды айтсам, менің де көңілім қалды", – дейді Тамара Дүйсенова.

Оның айтуынша, қазақстандықтар әрқашан мәдениетті әрі толерантты болып ерекшеленеді.

"Біз әрдайым өзімізді ұстай білдік. Елімізде бәрі жаман деп айта алмаймын. Ол жерде болғандар бүкіл Қазақстан азаматтары емес қой. Кейбірі ғана. Өзімізбен жұмыс істеу керек шығар. Мұндай мінез-құлық бізде ғана емес, басқа елдерде де бар. Біз қазақстандықтар еліміздің имиджі үшін жауапты екенімізді түсінуіміз керек", - деп түйіндеді министр.

28 тамызда Астана әкімі Жеңіс Қасымбек полицияға бұзақылық және қоғамдық тәртіпті бұзу фактілеріне жол берген тұлғаларды анықтау тапсырылғанын айтты. Оның айтуынша, олар жауапкершілікке тартылады.

Оқи отырыңыз