Арман Жұмагелдиевтің ісі: жәбірленушілер отбасының қауіпсіздігі үшін қорқып отыр
Сурет: Instagram/armandzhumageldiev
Біраз жәбірленуші, кейбір айыпталушылар мен олардың адвокаттары, сондай-ақ куәгерлер сот отырыстарын жабық есік жағдайында өткізу туралы өтінішхат жолдады.
Олар сотталушылар тарапынан өз өмірі мен отбасының қауіпсіздігіне қауіп төніп тұрғанын мәлімдеді.
Сотқа Арман Жұмагелдиев пен Алматы қаласы мәслихатының экс-депутаты Қайрат Құдайбергенді қоса есептегенде, 45 адам тартылған. Оларға Қазақстан Республикасы Қылмыстық кодексінің 362 ("Билікті немесе лауазымдық өкілеттіктерді теріс пайдалану"), 262 ("Ұйымдасқан топты, қылмыстық ұйымды құру және басқару, сол сияқты оларға қатысу"), 272 ("Жаппай тәртіпсіздік"), 191 ("Тонау"), 126 ("Заңсыз бас бостандығынан айыру"), 268 ("Бандитизм") баптары бойынша айып тағылып отыр.
Бұған дейін Ішкі істер министрлігі Арман Жұмагелдиев шетелден 2021 жылдың желтоқсан айында келгенін және қаңтар оқиғасы кезінде Алматыда болғанын хабарлаған еді. Ол бес адамнан тұратын қылмыстық топпен бірге 2022 жылдың 7 қаңтарында арнайы операция кезінде ұсталды. Содан кейін күдіктілерден әртүрлі маркадағы қару-жарақ, сондай-ақ оларға арналған оқ-дәрілер, қалақшалы қарулар мен броньдалған көлік тәркіленді.
Бас прокуратура Жұмагелдиевтің қарулы адамдары кездейсоқ өтіп бара жатқан 24 бейбіт тұрғынды ұрлап, күштеп ұстағанын мәлімдеді.
