Қайрат Боранбаев Астанадағы қонақ үй кешенін мемлекет меншігіне берді

Тергеумен ерікті ынтымақтастық аясында ҚМА Қайрат Боранбаевтың мүлкін мемлекетке қайтару шараларын қабылдап жатыр, деп хабарлайды Zakon.kz.

Бұл жөнінде ведомствоның Telegram арнасында жарияланған хабарламада:

"Қ. Боранбаевтың компаниялары Мемлекеттік мүлік комитетіне жалпы құны 1,4 млрд теңгеден асатын Comfort Hotel Astana қонақ үй кешенін мемлекет меншігіне өз еркімен беру үшін тиісті өтінімдер берді", – делінген.

ҚР ҚМА ұсынған мәлімет бойынша, аумағы 5 мың шаршы метрден асатын бұл қонақ үй кешенінің жылдық айналымы 900 млн теңгеге жуық.

"Қолданыстағы заңнамаға сәйкес бұл нысанды демалыс, сауықтыру және білім беру орталықтарын ұйымдастырумен әлеуметтік мақсатта пайдалану жоспарланған", – деп нақтылады ведомствоның баспасөз қызметі.

ҚР ҚМА активтерді қайтару бойынша белсенді жұмыстар жалғасын табатынын айтты.