Экс-министр Бишімбаевтың ұсталуына қатысты Ішкі істер министрлігі түсініктеме берді
Сурет: Facebook/Куандык Бишимбаев
Журналистер "әйелін өлтірді" деген күдікпен ұсталған Қуандық Бишімбаев ісінің мән-жайын сұрады.
"Ол қамауға алынды, қазір тергеу шаралары жүргізіліп жатыр. Басқа мәлімет бере алмаймын. Жұмыс аясында сізге қосымша ақпарат беріледі. Бізде осы іспен айналысып жатқан тергеу бөлімінің қызметкерлері бар. Солар сіздерге кейінірек түсініктеме береді деп ойлаймын". Сәкен Сәрсенов
Сәкен Сәрсенов бұл деректің егжей-тегжейін айтқан жоқ. Ішкі істер министрлігінің өкілі бұрынғы министрдің есірткі немесе алкогольдік масаң күйде болғаны жөніндегі қауесеттерге де түсінік беруден бас тартты.
"Қазір айта алмаймын. Жүргізіліп жатқан тергеу шаралары аясында мен ешқандай түсініктеме бере алмаймын. Полиция департаменті барлығына бірдей ақпарат таратқан. Сондықтан кейбіреуге расталды, кейбіреуге расталмады деу дұрыс емес шығар". Сәкен Сәрсенов
2017 жылы 11 қаңтарда бұрынғы Ұлттық экономика министрі Қуандық Бишімбаевтың ұсталғаны белгілі болды. Атышулы сыбайлас жемқорлық ісі бойынша 23 адам, оның ішінде экс-министрдің немере ағасы да сотта жауап берді. Жоғары лауазымды шенеунік өз мансабы барысында Қызылордада шыны зауытын салу кезінде 1 млрд теңге ұрлағаны және бірнеше рет пара алғаны үшін кінәлі деп танылды.
2018 жылдың наурыз айында Қуандық Бишімбаев 10 жылға бас бостандығынан айырылды. 2018 жылдың желтоқсанында ол өзін қоныс аудару колониясына жіберуді сұрап, өтініш берді, бірақ сот өтінішті ішінара қанағаттандырды. 2019 жылдың қаңтарында экс-министр жазасын өтеу үшін Шымкенттегі ИЧ-167/3 орта қауіпсіздік мекемесіне ауыстырылды.
2019 жылдың 11 қазанында Қуандық Бишімбаев бостандыққа шықты. ҚР ІІМ ҚАЖК баспасөз қызметі экс-министрдің шартты түрде мерзімінен бұрын босату туралы өтінішін Шымкент қаласы Абай аудандық соты 2019 жылдың 25 қыркүйегінде қарап, оның қанағаттандырылғанын хабарлады. Сот шешімі 2019 жылдың 11 қазанында заңды күшіне енді.
