Астанада IT маманы 57 миллион теңгенің техникасын сатып, ақшасын құмар ойынға салып жіберген
![IT маман, Астана, құмар ойын, сот, сурет - Zakon.kz жаңалық 05.12.2023 15:59](https://kaz.zakon.kz/pbi/WEBP/2023-12-05/file-b885c2c1-4246-4538-8db2-2ce8c05d92de/800x450.webp)
Астана сотының баспасөз қызметінің 5 желтоқсан күні хабарлауынша, фирманың бұрынғы қызметкері ҚК-нің 189-бабы 4-бөлігінің 2-тармағы бойынша сотталды. Ер адам IT маманы болып жұмыс істеп, жеке қаржылық мәселелерін шешу үшін жұмыс істейтін кеңсе жабдықтарын сатқан.
Сот таратқан мәлімет бойынша, астаналық жігіт ЖШС-де IT-маман болып жұмыс істей жүріп, материалдық жауапты адам бола тұра, өзіне сеніп тапсырылған, жалпы сомасы 57 млн теңгеден астам сомаға ұйымдастыру техникасын талан-таражға салып, одан түскен ақшаны букмекерлік кеңселерде жұмсағаны үшін кінәлі деп танылды.
Астана қаласының қылмыстық істер жөніндегі ауданаралық сотының 2023 жылғы 9 қазандағы үкімімен ол бес жыл мерзімге коммерциялық ұйымдарда материалдық-жауапты лауазымдарды атқару құқығынан айырылып, жеті жылға сотталды.
Үкім заңды күшіне енді. ЖШС-ға келтірілген залал өтелген жоқ.