Таразда балабақшалардың бірінің басшысы 13 млн теңге бюджет қаражатын жымқырды деген күдікке ілінді

Тараз қаласының прокуратурасы қаладағы балабақшалардың бірінен бюджет қаражатын жымқыру фактісін анықтады. Балабақша басшысы жоқ балаларға мемлекеттен ақша алып отырған, деп хабарлайды Zakon.kz.

Жамбыл облысының прокуратурасы таратқан мәліметке сүйенсек, "РозАль" орталығы" жеке балабақшасы басшылығы мектепке дейінгі ұйымдарды жан басына шаққандағы қаржыландыру аясында бөлінген 13 млн теңге бюджет қаражатын жымқыру фактісі анықталған.

"Осы факт бойынша 25.09.2023 жылы ҚК-нің 190-бабы 2-тармағының 4-бөлігі бойынша қылмыстық іс қозғалып, ол Жамбыл облысының Экономикалық тергеп-тексеру департаментіне тапсырылды".Жамбыл облысы прокуратурасының баспасөз қызметі

Қадағалаушы орган қылмыс жасады деген күдікпен балабақша басшысы соттың санкциясымен қамауға алынғанын атап өтті.