Ақтөбе облысында жолаушылар автобусы аударылып, 32 адам эвакуацияланды

Қолайсыз ауа райы, Ақтөбе, жолаушылар автобусы аударылды, сурет - Zakon.kz жаңалық 30.12.2023 01:27

Сурет: pxhere

29 желтоқсанда сағат 18:50-де Әйтеке би ауданы, "Қарабұтақ - Қостанай" тас жолының 132-ші шақырымында жолаушылар автобусы аударылып, ондағы шетел азаматтары төтеншеліктердің көмегімен аман-есен эвакуацияланды, деп хабарлайды Zakon.kz.

Ақтөбе облыстық ТЖД баспасөз қызметінің хабарлауынша, оқиға орнында зардап шеккендер жоқ.

"Жолаушылар "Екатеринбург-Шымкент" бағытындағы автобуста болған. Оқиға орнында аудандық төтенше жағдайлар бөлімдері қызметкерлері, жергілікті атқарушы органдар, полиция бөлімі қызметкерлері болды. Өзбекстанның 32 азаматы Т.Жүргенов ауданындағы мешітке эвакуацияланды".Ақтөбе облыстық ТЖД баспасөз қызметі

Облыстық төтенше жағдайлар департаменті азаматтарға ауа райындағы өзгерісті қадағалауға, ауа райының нашарлауы және жолдардағы көлік қозғалысына енгізілген шектеулерге дер кезінде көңіл бөліп, алыс сапарға шықпауға кеңес береді.

Айта кетсек, 29 желтоқсанда кешке қолайсыз ауа райына байланысты еліміздің 9 өңіріндегі жолдарда шектеу енгізілгені белгілі болды. Сондай-ақ Көкшетау-Астана тас жолында қалып кеткен 200-ден астам адам пойызбен эвакуацияланды.

Оқи отырыңыз