Қызылорда облысында кене шаққан ер адам Конго-Қырым геморрагиялық қызбасынан көз жұмды
Сурет: Zakon.kz
"Кене шағып алғаннан кейін ер адам медициналық мекемеге бармаған. Ол басқа туыстарымен араласып, шаруа қожалығындағы жұмысымен айналысып, ауруын асқындырып алған. Ол бізге ауруханаға бірнеше күннен кейін, жағдайы ауырлағанда жеткізілді. Оған қажетті барлық медициналық көмек көрсетілді, бірақ дәрігерге кеш қаралғандықтан оны құтқару мүмкін болмады", - деді облыстық жұқпалы аурулар ауруханасының бас дәрігері Әділбай Медетбаев.
Облыстық санитарлық-эпидемиологиялық бақылау департаментінің басшысы Әлия Әбдіқайымова брифинг барысында атап өткендей, безгектің расталу жағдайы сәуір айында тіркелген. 2024 жылдың басынан бері кене шаққаннан кейін осындай ауру күдігімен 108 қызылордалық дәрігерге жүгінген.
Дәрігерлер жаз әлі келіп жетпесе де Қызылорда облысында күн өте ыстық екенін және кенелер ерте оянғанын атап өтті. Аймақтың климаты кенелердің көбеюіне қолайлы, өйткені мұнда жаз ыстық, ауа температурасы жоғары.
2024 жылдың наурыз айынан бастап Қызылорда облысында зоопаразитологиялық топпен кенелер жинап алынады. Бүгінгі таңда 12 мыңға жуық кене жиналды, оның ішінде 1331-інен сынамалар алынды. Олардың 13-і Конго-Қырым безгегі бойынша оң нәтиже берді.
Дәрігерлер облыс тұрғындарына далада және мал қорада болған кезде барынша сақ болу керектігін еске салады. Егер Конго-Қырым геморрагиялық қызбасы белгілері анықталса, дереу медициналық көмекке жүгіну керек.
Облыстық мобилизациялық дайындық басқармасының басшысы Марат Құрманбаев Қызылорда облысындағы 115 елдімекен қолайсыз деп танылып, кенеге қарсы дезинфекция шаралары жүргізіліп жатқанын, оның 8 маусымға дейін жалғасатынын атап өтті.
