Қазақстанда автокөлікті техникалық байқау жүйесінің операторы өзгерді

Көлік министрі 2024 жылғы 22 сәуірдегі бұйрықпен механикалық көлік құралдары мен олардың тіркемелерін міндетті техникалық байқаудың бірыңғай ақпараттық жүйесінің операторын анықтады, деп хабарлайды Zakon.kz.

"ҚазАвтоЖол" ұлттық компаниясы акционерлік қоғамы механикалық көлік құралдары мен олардың тіркемелерін міндетті техникалық байқаудың бірыңғай ақпараттық жүйесінің операторы болып белгіленсін", – делінген құжатта.

"Ұлттық ақпараттық технологиялар" АҚ аталған жүйені "ҚазАвтоЖол" Ұлттық компаниясы" АҚ балансына бергенге дейін техникалық сүйемелдеуді жалғастыруға нұсқау берді.

Сонымен қатар, ҚР Индустрия және инфрақұрылымдық даму министрінің 2023 жылғы 9 маусымдағы №421 "операторды айқындау туралы" бұйрығы жойылды.

Бұйрық қол қойылған күнінен бастап күшіне енеді.