Қазақстандық азамат Қырғызстан шекарасынан заңсыз өтпек болған кезде жоғалып кетті

Қырғызстан полициясы шекараны заңсыз кесіп өтпек болған кезде жоғалып кеткен қазақстандық жас жігітке қатысты анықтама жариялады. Оның жоғалғанын әкесі айтты, деп хабарлайды Zakon.kz.

24.kg агенттігінің хабарлауынша, қазақстандықты Шу облысының ішкі істер департаменті іздеуде.

"Полицияға Қазақстан азаматы хабарласып, оның 1997 жылы туған ұлы Әлібек Саматулының жоғалып кеткені туралы айтты. Ол 14 қарашаға қараған түні қазақ-қырғыз шекарасын заңсыз кесіп өтпек болған жерінде жоғалып кеткен", — делінген хабарламада.

Жоғалған адамның белгілері: бойы 174 сантиметр, дене бітімі орташа, шашы қысқа және бетінде мең бар. Ерекшелігі — сол аяқтағы тыртық. Жоғалып кеткен кезде оның үстінде қара спорт костюмі және жеңінде қызыл жолағы бар ақ жиекті қара күрте болған.

Сурет: Шу облысының ішкі істер бас басқармасы

Бұл оқиға бойынша сотқа дейінгі тергеу басталды.

Бұған дейін олар Қырғызстанмен шекарада электронды кезек енгізуді жоспарлап жатқаны хабарланған болатын. Әңгіме Жамбыл облысындағы "Айша-Бибі", "Аухатты", "Қарасу", "Қордай", "Сартөбе", "Сыпатай батыр" және Алматы облысындағы "Кеген" автомобиль өткізу бекеттері туралы болып отыр.