ШҚО-да полицейлер көшеде есінен танып жатқан ер адамға көмектесті

Алтай ауданында патрульдік полиция инспекторлары көшеде жерге құлап жатқан ер адамды байқаған. Полиция капитаны Ринат Қуаниязов пен полиция аға лейтенанты Сырым Қалиқан оған бірден алғашқы медициналық көмек көрсетіп, артынша ауруханаға жеткізген, деп хабарлайды Zakon.kz.

ҚР ІІМ баспасөз қызметінің хабарлауынша, медицина қызметкерлері 70 жастағы зейнеткерге жүрек талмасы диагнозын қойды. Полиция қызметкерлерінің шұғыл әрі сауатты әрекетінің арқасында оған медициналық көмек уақытында көрсетілген болып шықты.

"Мұндай сәтте қиын жағдайға тап болған адамды құтқару туралы ғана ойлайсың. Біз тек өз борышымызды орындадық", — деді полиция қызметкері Ринат Қуаниязов.

Зардап шеккен азаматтың жұбайы тәртіп сақшыларына алғысын білдірді.

5 сәуірде Ақмола облысы Атбасар қаласында ТЖМ қызметкерлері 97 жастағы кейуананы құтқарғанын жазғанбыз. Әлеуметтік қызметкер қарт адамның ұзақ уақыт есік ашпағандықтан құтқарушылар көмегіне жүгінген.