Семейде әскери қызметкер өртеніп жатқан үйден әйелді аман алып шықты

Жүргізуші, Семейде орналасқан әскери бөлімнің коменданттық взводының электрикі, қатардағы Қызыр Мұхаметжанов жеке тұрғын үйдегі өрт кезінде әйелді аман алып қалды. Істің мән-жайын Zakon.kz тілшісіне Қорғаныс министрлігінің (ҚМ) баспасөз қызметі хабарлады.

Белгілі болғандай, 2025 жылдың 10 маусымында кешкі уақытта сарбаз дүкенге бара жатқан. Қалалық аллеялардың бірінде үйдегі өртті өшіріп жатқан адамдарды көрді.

Жанып жатқан ғимараттың терезелерінен жанұшыра шыққан айқайды естіген әскери қызметші еш ойланбастан көмекке жетті.

"Қоршауды айналып өткен ол терезе әйнегін сындырып, жанып жатқан бөлмеге кірді. Бұл кезде қалың түтіннің салдарынан үй ішінде ештеңе көрінбейтін. Сол себепті Қызыр Мұхаметжановқа айқайлаған дауысқа құлақ түруге тура келді. Соның арқасында ол үй ішінен әйел адамды тез тауып, сыртқа көтеріп алып шықты." ҚР Қорғаныс министрлігі

Жедел медициналық жәрдем бригадасы зардап шеккен адамды қаладағы ауруханаға жеткізді. Қазір ол ем қабылдап жатыр.

Екі баланың әкесі қатардағы жауынгер Қызыр Мұхаметжанов он жылдан астам уақыттан Қарулы күштер сапында келісімшарт бойынша қызмет етіп келеді.

Қызыр өзінің іс-әрекетін батырлық деп санамайды. Өйткені қиын сәтте көмек қолын созу ол әр азаматтың міндеті дейді. Әскерде қалыптасып қалған әдетінше ол жедел, әрі батыл әрекет етуге шешім қабылдауға әркез дайын.