Алматыда Mitsubishi көлігі автобуспен соқтығысып, жүргізуші ауруханаға түсті

22 қыркүйек күні таңертең Алматыда Mitsubishi Lancer көлігі мен Kaessbohrer Setra маркалы автобус қатысқан жол-көлік оқиғасы болды, деп хабарлайды Zakon.kz.

Алдын ала ақпарат бойынша, туристік автобус Назарбаев даңғылы бойымен оңтүстік бағытта келе жатқан. Ал жеңіл көлік Мәметова көшесімен шығысқа қарай қозғалып, Назарбаев даңғылына солға бұрылмақ болған.

Сурет: Zakon.kz

Белгісіз себептермен Mitsubishi Lancer жүргізушісі қарсы қозғалыс жолағына шығып кеткен.

Сурет: Zakon.kz

Содан кейін ол жоғары жылдамдықпен автобусқа соғылған. Апат салдарынан Mitsubishi жүргізушісі ауыр жарақат алып, жедел түрде ауруханаға жеткізілді.

Сурет: Zakon.kz

Аталған жол-көлік оқиғасының барлық мән-жайын полиция қызметкерлері анықтауда.

Бұған дейін Алматыда жеңіл көлік ағаштарды кесіп өтіп, қарсы бағыттағы автокөлікпен соқтығысқанын жазған болатынбыз.