Тоқаев медицина қызметкерлерін кәсіби мерекесімен құттықтады

Жыл сайын маусым айының үшінші жексенбісінде Қазақстанда медицина қызметкерлері күні атап өтіледі. Бұл мереке Қазақстан Республикасы Президентінің Жарлығымен 1998 жылы белгіленді, деп хабарлайды Zakon.kz.

Мемлекет басшысы Қасым-Жомарт денсаулық сақтау саласының қызметкерлерін Медицина қызметкері күнімен құттықтады, деп хабарлайды Ақорда.

Президент олардың адамгершілік пен ізгілік мұраттарына қалтқысыз қызмет етіп келе жатқанын баса айтты.

Қоғамымыз дәрігер парызының ерекше мән-маңызына күн өткен сайын көз жеткізуде. Көптеген дарынды жастар осы мамандықты игеруге ұмтылып жатыр. Мемлекет медицина қызметкерлеріне жан-жақты қолдау көрсетіп, денсаулық сақтау саласын дамытуға баса назар аударады. Ұлт саулығы – Жаңа Әділетті Қазақстанды құру жолындағы мемлекеттік саясатымыздың аса маңызды бағыты. Қасым-Жомарт Тоқаев

Мемлекет басшысы ақ халатты абзал жандарға ерен еңбектері, Гиппократ антына адалдықтары үшін шын жүректен ризашылығын білдіріп, зор денсаулық, бақ-береке тіледі.