Тоқаев Қырғызстанның Қазақстандағы мәдениет күндерінің ашылу шарасына қатысты

Мемлекет басшысы Қасым-Жомарт Тоқаев Қырғыз Республикасының Қазақстандағы мәдениет күндерінің ресми ашылу шарасына қатысты, деп хабарлайды Zakon.kz.

Мемлекет басшысы Қасым-Жомарт Тоқаев Қырғызстан президенті Садыр Жапаровпен және Еуропалық Кеңес президенті Шарль Мишельмен бірге Қырғыз Республикасының Қазақстандағы мәдениет күндерінің ресми ашылу шарасына қатысты, делінген Ақорда хабарламасында.

Сурет: akorda.kz

Президенттер Қырғызстанның Ұлттық тарихи мұражайының коллекциясы қойылған "Ықылым мұрасы" көрмесімен танысты. Содан соң қырғызстандық өнер шеберлерінің концертін тамашалады.

Сурет: akorda.kz

Концерт бағдарламасы аясында "Манас" эпосынан үзінді оқылып, халық ақыны Тоқтоғұл Сатылғановтың санаттары (дидактикалық өлеңдері) орындалды. Сондай-ақ халық жазушысы Шыңғыс Айтматовтың шығармаларынан үзінділер қойылды.

Сурет: akorda.kz

Сонымен қатар қазақ және қырғыз халықтарының бауырластығын дәріптеу мақсатында қырғыз өнерпаздары Шоқан Уәлиханов, Абай Құнанбаев, Жамбыл Жабаев, Мұхтар Әуезов сияқты тұлғаларымыздың бейнесін сомдап, екі халыққа кең тараған ән-күйлерді орындады.

Сурет: akorda.kz

Алдында Ақорда резиденциясында Қасым-Жомарт Тоқаев 26 қазанда Қазақстанға ресми сапармен келген Еуропалық Кеңестің президенті Шарль Мишельмен келіссөздер өткізген болатын. Сондай-ақ олар БАҚ өкілдеріне арнап брифинг  өткізді. Орталық Азия мемлекеттерінің басшылары бірлескен мәлімдеме  жасады.