БҚО полицейлері жоғалып кеткен үш жасар бүлдіршінді тауып, анасына табыстады

Жоғалған үш жасар бүлдіршін, БҚО, сурет - Zakon.kz жаңалық 29.08.2023 20:17

Сурет: polisia.kz

Үш жасар бүлдіршін 28 тамызда кешке қарай жоғалып кеткен. Баланың анасы полиция көмегіне жүгінді, деп хабарлайды Zakon.kz.

Қараңғы түскен уақытта әйел қызымен келе жатып, кенет одан көз жазып қалған. Алдымен баланы әйел өз бетінше іздеп, табуға тырысқан. Онысынан түк шықпаған соң үрейлі әйел полиция қызметкерлеріне хабарласқан.

"Кішкентай бүлдіршінді іздеуге полиция бөлімінің барлық жеке құрамы жұмылдырылып, іздеу жұмыстары түнімен жүргізілді. Іздеу іс-шарасына 200-ден астам полиция қызметкері қатысып, соның ішінде шекара, төтенше жағдайлар қызметі, әкімдік және жергілікті ауыл тұрғындары, барлық аудан қызметтері ат салысқан", делінген полиция хабарламасында.

Іздеу салынған Айару таңғы 04:00-де шекара қызметінің кинолог иттерінің көмегімен ауылдан 6 шақырым қашықтықтан табылған.

Қыз аман-сау аудандық ауруханаға жеткізілді.

Қазіргі уақытта бүлдіршіннің өмірі мен денсаулығына еш қауіп төніп тұрған жоқ.

Оқи отырыңыз