БАҚ-тарда Қуандық Бишімбаевтың әйелін өлтірді деп күдікке ілінгені туралы ақпарат пайда болды
Сурет: Facebook/Куандык Бишимбаев
Алдын ала мәліметтер бойынша, елордадағы Bau мейрамханасында мас күйдегі экс-шенеунік әйелін өлімші етіп сабаған. Зардап шегуші жедел жәрдем көлігі келгенге дейін көз жұмған. Оқыс оқиға 9 қарашада кешке Астанада болған. Бұл туралы кейбір БАҚ өз ақпарат көздеріне сілтеме жасай отырып хабарлайды.
Zakon.kz құқық қорғау органдарынан түсініктеме алу үшін ресми сауал жолдап, жауап күтіп отыр.
Қуандық Бишімбаев 2016 жылы "Бәйтерек" холдингіндегі қызметі бойынша туындаған мәселелерге байланысты қызметінен шеттетілді. Ол кезде ол Ұлттық экономика министрі болып тұрған.
2017 жылы 11 қаңтарда бұрынғы Ұлттық экономика министрі Қуандық Бишімбаевтың ұсталғаны белгілі болды. Атышулы сыбайлас жемқорлық ісі бойынша 23 адам, оның ішінде экс-министрдің немере ағасы да сотта жауап берді. Жоғары лауазымды шенеунік өз мансабы барысында Қызылордада шыны зауытын салу кезінде 1 млрд теңге ұрлағаны және бірнеше рет пара алғаны үшін кінәлі деп танылды.
2018 жылдың наурыз айында Қуандық Бишімбаев 10 жылға бас бостандығынан айырылды. 2018 жылдың желтоқсанында ол өзін қоныс аудару колониясына жіберуді сұрап, өтініш берді, бірақ сот өтінішті ішінара қанағаттандырды. 2019 жылдың қаңтарында экс-министр жазасын өтеу үшін Шымкенттегі ИЧ-167/3 орта қауіпсіздік мекемесіне ауыстырылды.
2019 жылдың 11 қазанында Қуандық Бишімбаев бостандыққа шықты. ҚР ІІМ ҚАЖК баспасөз қызметі экс-министрдің шартты түрде мерзімінен бұрын босату туралы өтінішін Шымкент қаласы Абай аудандық соты 2019 жылдың 25 қыркүйегінде қарап, оның қанағаттандырылғанын хабарлады. Сот шешімі 2019 жылдың 11 қазанында заңды күшіне енді.
