Сотта Талдықорған полициясы экс-басшысының денсаулығы сыр беріп, шұғыл ауруханаға жеткізілді
Сурет: gov.kz
Бұл ақпаратты Zakon.kz-ға Жетісу облысының соты жеткізді.
"Жетісу облысы сотының баспасөз қызметі сот отырысы кезінде сотталушыны "жедел жәрдем көлігі" алып кеткені туралы ақпаратты растайды. Қазіргі уақытта сотталушы кардиологиялық орталықта, дәрігерлер бақылауында. Осыған байланысты сот отырысы кейінге қалдырылды", - деді соттағылар.
Айта кетсек, 2024 жылы 28 ақпанда Марат Күштібаевтың зорлау ісі бойынша сот процесі басталғаны хабарланды. Процесс жабық режимде өтіп жатыр. Ол тоғыз жылдан 12 жылға дейін бас бостандығынан айыру жазасына кесілуі мүмкін.
2023 жылы 13 қарашада әлеуметтік желіде 27 жастағы келіншекті зорлады деген күдікпен Талдықорған қаласы полиция басқармасының бастығы Марат Күштібаевтың ұсталғаны туралы ақпарат тарады. Кейін бұл ақпаратты Жетісу облысы полиция департаментінің бастығы Атығай Арыстанов растады.
Бұған дейін Марат Күштібаевтың қол астындағы қызметкерлерін балағаттаған аудиосы желіде тараған. Мысалы, осындай жағдайдың бірі 2019 жылдың қыркүйегінде тіркелді. Қызметтік тергеу қорытындысы бойынша Марат Күштібаев Алматы облысы полиция департаментінің жергілікті полиция қызметінің бастығы қызметінен босатылған болатын.
Марат Күштібаев ұсталғаннан кейін Ішкі істер министрі Ержан Сәденов Жетісу облысына келді. Жетісу облысы ПД бастығы Атығай Арыстанов та қызметінен босатылды.
