Әскери қызметшілерді үй салуға мәжбүрледі: бұрынғы ТЖ вице-министріне қатысты үкім шықты

Сурет: primeminister.kz

Сыбайлас жемқорлыққа қарсы іс-қимыл агенттігінің ресми өкілі Данияр Бигайдаров 7 тамызда өткен брифингте Ақмола гарнизонының әскери соты бұрынғы Төтенше жағдайлар вице-министрі Ибрагим Күлшімбаевқа қатысты үкімді жариялағанын айтты, деп хабарлайды Zakon.kz.

Спикердің айтуынша, Күлшімбаев қызметін асыра пайдаланғаны үшін кінәлі деп танылған. Ол ТЖМ ведомстволық бағынысты мекемелерінің басшылығына өзінің жеке үйін салуға әскери қызметкерлер мен арнайы техниканы тарту туралы заңсыз нұсқаулар берді.

"Сот үкімімен оған мемлекеттік қызметте және квазимемлекеттік сектор субъектілерінде қызмет атқаруға өмір бойына тыйым сала отырып, 5 жыл мерзімге бас бостандығынан айыру түріндегі жаза тағайындалды. Сот Мемлекет басшысының атына Күлшімбаевты генерал-майор әскери атағынан айыру туралы ұсыныс енгізуді ұйғарды", — деді ресми өкіл.

Данияр Бигайдаров үкім заңды күшіне енбегенін нақтылады.

2023 жылғы 22 тамызда Ибрагим Күлшімбаев бірінші вице-министр қызметінен босатылған болатын.

Оқи отырыңыз