Ақтөбеде сапасыз жүргізілген құрылыс кесірінен мемлекетке 337 млн теңге шығын келді

Ақтөбе қалалық №2 сотында 6 қарашада 337 млн теңге материальдық шығын келтірген төрт адамға қатысты алаяқтық және екі тұрғын үй алабы бойынша сапасыз құрылыс жүргізу бабымен қозғалған қылмыстық іс қаралды, деп хабарлайды Zakon.kz.

Іс материалдарын қарау кезінде 2017-2019 жылдар аралығында Ж. алдын ала сөз байласу арқылы А., К. және Д-мен Ақтөбе қаласы Алматы ауданы Қарғалы тұрғын алабының №39 К және №40 К тұрғын үйлерінің шарт талаптарына және жобалық құжаттамасына сәйкес келмейтін сапасыз салынған тұрғын үйлерді пайдалануға бергені анықталды. Іс бойынша 46 тұлға жәбірленушілер болып танылды. Осылайша, қала әкімінің аппараты атынан мемлекетке жалпы сомасы 337 млн теңгеге материалдық залал келтірілді.

Сот отырысында сотталушылар кінәләрін мойындамады.

Сотталушылардың кінәсі жәбірленушілердің жауаптарымен, куәгерлердің жауаптарымен, сынақ хаттамасымен, сараптама қорытындысымен және қылмыстық іс бойынша басқа да дәлелдемелермен толық расталды.

Сот үкімімен сотталушылар Ж және А. мүлкі тәркіленіп, құрылыс саласындағы қызметпен айналысу құқығынан 10 жыл мерзімге айыра отырып, 6 жылға бас бостандығынан айыру жазасы тағайындалды.Сотталушылар К. және Д. мүлкі тәркіленіп, 10 жыл мерзімге инженерлік қызметтер саласындағы қызметпен айналысу құқығынан айыра отырып, 5 жылға бас бостандығынан айыру жазасы тағайындалды.

Сот үкімі заңды күшіне енген жоқ.