Батыс Қазақстан облысына ұшқышсыз ұшу апараты құлады

Батыс Қазақстан облысында табылған ұшқышсыз ұшу апаратына ұқсайтын затқа қатысты полиция тексеру шараларын қолға алды, деп хабарлайды Zakon.kz.

Белгісіз ұшу аппараты 18 ақпанда кешке БҚО, Бөкей ордасы ауданы, Ұялы ауылының аумағынан жергілікті тұрғындар тауып алды, деп хабарлады "Мой город" басылымы. Дрондың ұзындығы - 120 сантиметр. 

БҚО полициясы аталған ақпаратқа қатысты түсініктеме берді. 

"БҚО-да Бөкей ордасы ауданы, Ұялы елдімекені маңында ұшқышсыз ұшу аппаратына ұқсас затты табу фактісі бойынша полиция департаменті уәкілетті қызметтермен бірлесіп тексеру іс-шараларын қолға алды", деп хабарлады өңірлік ПД.

Бөкей ордасы ауданының аумағында Ресей Федерациясының Қорғаныс министрлігі жалдайтын "Капустин Яр" әскери полигоны орналасқанын еске сала кетелік.

Айта кетсек, 17 ақпанда Қазақстан мұнайын тасымалдайтын Каспий құбыр консорциумы желісіне дрондармен шабуыл жасалған.