Павлодарлық оқушылар шай саңырауқұлағы негізінде диабеттік сусынға патент алды
www.pavlodarnews.kz
Павлодар қаласы химия-биология бағытындағы Назарбаев Зияткерлік мектебінің 11-сынып оқушысы Абылайхан Кәріпбай мен 9-сыныптың оқушылары Адель Камалдинова, Азиза Киреева «Шай саңырауқұлағы негізінде алынған диабеттік сусын» пайдалы моделі патентіне ие болды, деп хабарлайды pavlodarnews.kz.
Бұл туралы агенттікке биология пәнінің мұғалімі Торғын Ғинаят айтты.
- Соңғы жылдары қант диабетімен ауыратын науқастардың саны артып келе жатқаны белгілі, - дейді Торғын Ғинаят. – Сондықтан аурудың алдын алу мақсатында осындай пайдалы емдік сусынды әзірлеуді жөн көрдік. Ғылыми жетекшісі - биология ғылымдарының докторы, Павлодар мемлекеттік педагогикалық университетінің биоценология және экологиялық зерттеулер орталығының директоры, жалпы биология кафедрасының профессоры Бибігүл Жұмабекова.
Оның айтуынша, оқушылар ғылыми жетекшімен бірге 2016 жылдың қаңтар айынан 2017 жылдың маусым айына дейін көп жұмыс атқарған. Олар шай саңырауқұлағын өсіру әдісін зерттеп, микробиологиялық зерттеулер жүргізген және нәтижесін ғылыми мақалаларда жариялаған. Шай саңырауқұлағы негізінде алынған «Алтын батыр» диабеттік сусынына лимон және түймедақ, қант және жасанды қант қосылған.
Сонымен қатар табиғи сусындар өндірісінің макетін құрастырған. Өндірістік жағдайда өндірудің технологиялық жақтарын қарастырып, өңіріміздегі орталықтардың бірінде эксперименттік тәжірибе жүргізген.
Бұл жобаны дайындау үшін көп уақыт пен күш жұмсадық. Түрлі қалаларға барып, жобамызды қорғадық. Жүлделі орындарға ие болдық. Біздің жобамен дайындалатын сусынның пайдасы мол екеніне күмәніміз жоқ. Оның құрамына шай, қант алмастырғыш, су және ашытқы кіреді. Тұтынушыларға ұнайды деген сенімдеміз, - дейді жоба авторларының бірі Адель Камалдинова.
Жоба жетекшілері пайдасы мол диабеттік сусындарды алдағы уақытта жергілікті дүкендерден сатып алуға болатынын айтады.
Ақбота Сейсенбаева
