Алматы облысында бірқатар дүкендерге ішімдік сатуға тыйым салынды
Алматы облысы ПД баспасөз қызметі
Алматы облысында Заңнама тәртібін бұзған 3 дүкеннің ішімдік сатуға арналған лицензиясы тоқтатылды, деп хабарлайды Zakon.kz облыстық Полиция департаментінің баспасөз қызметіне сілтеме жасап.
Тәртіп сақшыларының мәліметінше, Алматы облысының полицейлері ҚР ӘҚБк 200-бабына сәйкес түнгі уақытта немесе 21 жасқа дейінгі тұлғаларға алкогольдік өнімдерді саудалағаны үшін 40 астам сауда орнына қатысты хаттама толтырып, сот органдары арқылы 3 дүкеннің алкогольдік өнімдерді сату лицензиясын уақытша тоқтатқан.
Ведомство таратқан ақпаратқа сәйкес, облыс көлемінде өткізілген "Профилактика" жедел алдын алу іс-шарасы барысында жүз елуге жуық көңіл көтеру орындары мен тәулік бойы қызмет ететін сауда орталықтарына рейдтік шаралар ұйымдастырды.
"Мас күйде жасалатын түрлі қылмыстар мен құқық бұзушылықтардың алдын алу, әсіресе, жасөспірімдердер арасындағы қылмыстарды болдырмау мақсатында ұйымдастырылған арнайы шара барысында 400-ге жуық тәртіп бұзушылықты анықтадық. Іс-шара барысында түнгі мезгілде спирттік өнімдерді саудалағаны үшін сот органдары арқылы Қапшағай қаласындағы 3 дүкеннің алкоголь өнімдерін сатуға арналған лицензиясы уақытша тоқтатылды",- деп атап өтті полиция өкілдері.
Сонымен қатар, жасөспірімнің жеке-дара түнгі мезгілде қоғамдық орындарда жүруіне жол берген 134 ата-ана әкімшілік жауапкершілікке тартылған.
