Алматы облысында тиісті құжатсыз мал тасымалдағандар анықталды
1-trk.ru
Алматы облысының полиция қызметкерлері тисті құжатсыз мал тасымалдауға қатысты 43 деректі анықтады, деп хабарлайды Zakon.kz облыстық Полиция департаментінің баспасөз қызметіне сілтеме жасап.
"Құқықтық тәртіп" жедел алдын алу іс-шарасы барысында тәртіп сақшылары мал ұрлығының алдын алу мақсатында арнайы рейдтер жүргізіп, тиісті құжатсыз мал және ет өнімдерін тасымалдауға қатысты 43 дерек анықталған.
"Барлық автожолдарда патрульдік полицияның блок-посттары қойылды. Мал және ет өнімдерін тасымалдаумен айналысқан барлық автокөліктер тексерілуде. Осы уақыт ішінде 405 автокөлік тексеріліп, құжаттары заң талабына сәйкес келмейтін 43 жүргізушіге әкімшілік хаттама толтырылды", - деп атап өтті полиция өкілдері.
Сонымен қатар, тәртіп сақшылары мал сататын барлық базарларды, ет сату орындарын, шаруа қожалықтары мен қыстақтарды тексеруді жалғастыруда.
"Арнайы іс-шара кезінде бес күн ішінде 16 мал ұрлығы дерегі ашылды. Күдіктілердің өзге де қылмыстарға қатысы бары анықталуда. Жыл басынан бері малдарын ұрлап кеткен тұрғындарға 35 миллион материалдық шығын өтелген", - деп атап өтті облыстық полиция өкілдері.
Ведомство таратқан ақпаратқа сәйкес, бұған дейін жасалған бірқатар мал ұрлығы ашылған. Оның ішінде 2016 жылы Кеген ауданында орын алған ұрлықтың мән-жайы әшкере болып, зардап шегушілерге келтірілген материалдық шығын өтелді.
Айта кетейік, облыстық полицейлер жыл басынан бері 110 мал ұрлығын әшкерелеп, ұрылардың жетегінде кеткен 200-ге жуық малды заңды иелеріне қайтарған.
